Pag-umangkon ni Gwen napusilan

CEBU, Philippines - Pag-umangkon ni Gobernador Gwendolyn Garcia gipusil sa igsuon sa napildeng kandidato pagka-mayor sa lungsod sa Dumanjug samtang nagtan-aw og concert sa gym sa barangay Ylaya kagahapon sa alas 2 sa kaadlawon.

Ang napusilan mao si Lou Oliver Garcia, 32, molupyo sa barangay Looc. Ang gipasanginlang nagpusil mao si Wado Gica, molupyo sa barangay Sima ug igsuon sa naparot nga kandidato pagka-mayor nga si Efren Gontrano Gica.

Ang igsuon ni Gob. Garcia nga si Nelson Garcia maoy nakadaog pagka-mayor sa Dumanjug batok kang Gica.

Matud ni Sr. Insp. Rodrigo Giangan, hepe sa Dumanjug Police Station sa dihang nahinabi sa Banat News nga sa wala pa ang hitabo ang ig-agaw sa biktima nga si Francis Reconalla gisukmag ni Gica hinungdan nga midagan kini paingon sa gawas nga bahin.

Ang biktima misuway og sugat sa suspek apan mao na hinuon kini ang gipusil sa walang bahin sa iyang kamot ug gisundan pa sa laing pagpabuto sa armas.

Si Gica nagdali pagsibat human sa hitabo samtang ang biktima daling gihatod sa Barili District Hospital samtang nagpadayon ang hot pursuit operation sa kapolisan pagsikop kaniya.  – BANAT NEWS