Paz, Boy Radaza naproklamar na

CEBU, Philippines - Pormal nang giproklamar ang unang kongresista sa lone district sa dakbayan sa Lapulapu ug ang unang babayeng mayor sa dakbayan sa Lapulapu bisan pa sa pagduso og motion to suspend the proceedings sa kampo ni Junard “Ahong” Chan kagahapon sa hapon.Usa ka maayong gasa ngadto sa Lapulapu nga si Arturo Radaza human kini mikulit og 70,125 botos batok sa iyang mga kaatbang.

Samtang sa pagka-mayor nga si Paz Radaza nakakuha og 70,392 botos batok sa iyang mga kaatbang.

Lakip usab sa naproklamar mao ang mga sakop sa konseho nga giunhan ni Efren Herera, nagsunod silang Harry Don Radaza, Eduardo Cuizon, Eduardo Patalinghug, Alezander Gestopa, Atty. Francisco Senerpida, Rodolfo Potot, Queenie Malingin Ahmann, Melisa Dignos Vidal, Cornelio Pahang, Florito Puzon ug Roque Wagwag.

Samtang liboan ka mga supporters ni Chan ug congressional candidate Lito Ruiz midagsang sa City Hall sa dakbayan sa Lapulapu aron paghangyo sa Comelec Lapulapu nga ipa-oktaba una ang gipahigayong ihap sa mga transmitted memory cards sa PCOS machine ug pagpadeklarar sa mga opisyal nga mananaog sa milabay’ng piniliay.

Si Comelec registrar Ferdinand Guilde nagkanayon nga mosyon ni Chan ug Ruiz giduso sa mga abogado nila nga si Atty. Rolito Abing ug Atty. Arnold Cugal.

Apan matud pa ni Gujilde nga ang mosyon sa kampo ni Chan ug Ruiz kasamtangan gibasura gumikan  sa Comelec Resolution 8804 nga walay dawaton nga mosyon ug protesta samtang wala pay nadeklarar nga mananaog sa piniliay.

Gumikank niini, nahinayon ang proklamasyon mga alas 5:05 kagahapon sa hapon.

Ang dakbayan sa Lapulapu adunay 170,085 ka botante ug 134,653 lamang ang nakabotar sa milabay’ng Mayo 10 nga piniliay.  – BANAT NEWS