CEBU, Philippines - Naghitak nga vote buying sa kalungsoran ug dakbayan sa lalawigan sa Sugbo sa milabay’ng eleksiyon.
Mao kini na-obserbahan ni Liberal Party gubernatorial candidate Hilario “Junjun” Davide III sa dihang mibisita sa Capitol Social Hall atol sa gipahigayong canvassing niadtong miaging gabii diin naglabaw na og 100 mil botos ang iyang kaatbang nga si incumbent governor Gwendolyn Garcia.
Matud ni Davide atol sa iyang pagsuroysuroy niadtong adlaw sa eleksiyon wala siyay namatikdan nga dunay nahitabong pagpanikas gawas lang sa naghitak nga pagpamalit og mga botos diha sa kabarangayan.
Dugang ni Davide plano niya nga mobalik sa iyang propesyon nga mao ang pagpanglaban sa higayon nga mapildi gyud siya sa eleksyon.
Giklaro usab ni Davide nga wala siyay nadawat nga “offer” nga posisyon sa Malacañang gikan ni Sen. Benigno Aquino III nga maoy leading ug dumadaog pagka-presidente.
Hinuon padayon usab nga naglabaw og maayo ang runningmate ni Davide nga si incumbent Vice Governor Gregorio Sanchez Jr., batok sa runningmate ni Garcia nga si Glenn Soco.
Si Garcia sa iyang bahin mireklamo sa paagi sa pagpangampaya sa Liberal party nga matud pa nakahatag kaniya og kaulawan.
Gipakita ni Garcia ang leaflets nga naghulagway kaniya sa iyang paglaban sa kandidato pagka-presidente sa Lakas-Kampi-CMD nga si Gilbert “Gibo” Teodoro.
Matud niya nga ang maong leaflets walay kalahian sa pagpamutang ni congressman-elect Tomas Osmeña og higanteng mga banner sa South Road Properties nga nagsaway kaniya.
Gihulagway ni Garcia nga ang maong leaflets nga naghulagway sa mga isyo batok niya maoy nakapagamay sa iyang lead kang Davide. – BANAT NEWS