CEBU, Philippines - Gipasalamatan ni Mariquita Salimbangon Yeung ang iyang mga supporter sa dakbayan sa Bogo kay nakita niya nga kinasingkasing ang suporta kini bisan paman sa iyang kapildihan batok ni incumbent Mayor Celestino "Junie" Martinez.
Matud ni Mariquita sa press conference kagahapon nga iyang nakita nga nanghilak ang iyang mga dumadapig daw susama og namatyan, apan iyang napakita sa iyang mga dumadapig ang paningkamot ug gani nagtuo gyud siya nga siyay modaog kun wala pa teroristaha sa iyang kaatbang ang iyang mga dumadapig.
Apan miingon si Mariquita nga depende na kana sa iyang igsuong si Benhur Salimbangon unsaon niini pagpanalipod ang iyang mga supporter sa dakbayan sa Bogo.
Hinuon gipasalig ni Mariquita ngadto sa iyang mga dumadapig nga kanunay siyang magmonitor niini ug ipadayon niya ang iyang mahatag nga kaayohan sa katawhan diha sa maong dakbayan kay nasayod siyang gikinahanglan kaayo ang iyang tabang ilabina sa mga kabus.
Sa pikas bahin si Kongresista Benhur Salimbangon nagkanayon nga ila usab nga gitun-an ang pagpasaka og kaso sa mga sakop sa Board of Election Inspectors didto sa Pulangbato diin didto magsugod ang lalis tali kanila ug sa pamilyang Martinez niadtong Lunes atol sa eleksyon. – BANAT NEWS