'Junnie' mao gihapon ang mayor

CEBU, Philippines - Nagpabiling mayor sa dakbayan sa Bogo si Liberal Party candidate Celestino “Junnie” Martinez human kini milabaw og 6,068 ka botos batok sa iyang kaatbang nga si Mariquita Salimbangon Yeung sa Lakas Kampi-CMD.

Atol sa eskutenyo kagahapon sa 64 ka mga presinto sa mga sakop sa Board of Canvassers pinangulohan ni Bogo Election Registrar Atty. Enerio Ocariza, Bogo DepEd Supt. Bernardo Ysulan ug Bogo City Auditor Salvador Uy bisan pa sa pipila ka mga problemang nasinati naproklamar gyud si Martinez.

Base sa maong resulta si Celestino “Junie” Martinez Jr. nakakuha kini og 21,086 botos batok ni Mariquita Salimbangon Yeung nga mikuha lamang og 15,018 botos.

Samtang sa pagkabise mayor sa Bogo midaug si Santiago Sevilla tungod sa nakuhang 19,230 botos batok ni Ceasar Salimbangon nga mitala lamang og 14,152.

Sa pagkakongresista sa ikaupat nga distrito, si Celestino “Tining” Martinez III midaog diha sa dakbayan sa Bogo base sa nakuhang 19,999 ka botos samtang si Benhur Salimbangon nakakuha lamang og 16,990 botos.   Giangkon sa mga sakop sa BOC sa Bogo nga nalangay sila tungod sa nasugatang problema sa duha ka presinto sa Precinct 23 ug 24 sa barangay Anonang Norte human ang Board of Election Inspectors misumiter og blankong “back up memory card” nga walay sulod nga detalye sa ilang gihimong piniliay.

Maayo nalang nga ang orihinal nga memory card anaa pa sa sulod sa PCOS machine ug kini giablihan samtang nagtan-aw ang mga abogado sa nagkadaiyang partido sulod sa maong canvassing area. - BANAT NEWS