Napunggit sa nagbangga 2 ka sakyanan sa Banilad

CEBU, Philippines - Patay ang usa ka lalaki human kini maligsi sa nagbanggang L300 van ug 62B nga jeep de pasaheroan kagahapon sa hapon diha sa flyover sa GM Cuenco, barangay Banilad ning dakbayan.

Sa report sa DyAB kagahapon, ang namatay human mabanggai sa L300 mao si Sanie Lotivo kinsa gisuwayan unta pagdala sa North General Hospital apan wala na nakaabot nga buhi sa maong tambalanan.

Gikatahong misuway paglikay ang duha ka sakyanan nga dili magkabanggaanay apan sa paglikay niini, naglibog ang mga drivers hinungdan nahitabo na hinoon ang panagbangga.

Luwas ang ubang mga pasahero sa jeep apan duna gyu’y upat nga nangaangol nga gidala sa Gullas Hospital, duha ang gidala sa Cebu City Medical Center (CCMC) nga mao ang mga drayber sa duha ka sakyanan ug ang usa nga gikatahong dead on arrival nga mao si Lotivo.

Ang ubang mga pasahero nakaangkon og garas sa nawong, agtang ug sa ubang parte sa lawas.

Pipila ka oras ang milabay human sa panagbangga, giablihan pagbalik ang flyover human makuha ang mga nagbanggang sakyanan. - BANAT NEWS