PGMA 'daog' na sa Pampanga

CEBU, Philippines - Daw dili pa hingpit nga mawagtang sa politika si Presidente Gloria Macapagal Arroyo kinsa nagpapili sa pagka-kongresista sa 2nd district sa Pampanga.

Base sa partial ug unofficial tally sa GMA News.Tv pasado alas-2 sa hapon kagahapon, si Arroyo nakakuha na og 158, 034 botos batok sa tulo niya ka mga kaatbang nga wala gani makaabot og tag-50 mil ang botos.

Ang kaatbang ni Arroyo nga daghan-daghan og botos mao si Adonis Simpao nga nakakuha og 19,468 ug gisundan kini ni Filipinas Rosario Sampang nga nakakuha og 6,639 ug ang uwahi mao si Feliciano Serrano nga nakakuha og 3,372 botos.Mao kini ang labing una sa kasaysayan nga ang usa ka pangulo sa nasud subling nagpapili sa mas ubos pang posisyon.

Nagtuo ang mga kritiko ni Arroyo kaniadto pa nga ang pagdagan niini may kalambigitan sa planong pagpabilin niya sa gahum pinaagi sa pag-usab sa Konstitusyon ug pagbutang kaniya isip primero ministro.

Samtang mao pa usab kini ang labing unang higayon sa kasaysayan sa nasud nga ang usa ka napalagpot ug nakombiktong pangulo sa nasud nagpasubli sa pagkandidato sa susama gihapong posisyon.

Si kanhi presidente Joseph Estrada atol ning pagsulat sa balita naa sa ikaduhang pwesto sa presidential race sunod kang Sen. Benigno “Noynoy” Aquino. - BANAT NEWS