CEBU, Philippines - Napulo ka oras nga natanggong ang mga sakyanan ni 4th District congressional candidate Benhur Salimbangon, mga sibilyan, PNP ug mga sakop sa media human babagi sa mga sakyanan sa kampo ni Bogo Mayor Celestino “Junie” Martinez niadtong milabay’ng gabii.
Alas-3 sa milabay’ng hapon atol sa piniliay sa barangay Curba lungsod sa Medellin si Atty. Llewelyn Menchavez usa sa legal volunteer sa kampo ni Martinez mipasangil nga gi-harass sa usa ka opisyal sa barangay sa maong lungsod. Tungod niini miresponde ang kampo ni Salimbangon apan giingong usa sa mga sakop niini giingong adunay dalang armas. Dihang nahibaw-an sa kampo ni Martinez miresponde usab sila apan wala na nila maabti ang mga sakop ni Salimbangon kay nakabiya na kini.
Pipila ka minutos ang milabay ang mga supporters na usab ni Salimbangon maoy mireklamong gibabagan sa mga supporters ni Martinez nga makasulod sa Pulang Bato Elementary School sa dakbayan sa Bogo aron unta mobotar.
Tungod niini giadto kini ni Salimbangon uban sa iyang mga legal volunteers apan gibabagan sila ni Martinez gamit ang ilang mga sakyanan aron dili makagawas ang mga sakyanan sa mga sakop ni Salimbangon.
Tungod sa standoff miresponde sila si Supt. Julian Entoma ug Sr. Supt. Edgardo Inking ang gitudlong area supervisor sa 4th district sa Police Regional Office-7 aron husayon ang duha ka grupo.
Atol sa negosasyon sa kapolisan si Martinez mipadayag nga iya lamang paagion ang mga sakyanan sa mga sakop ni Salimbangon kun ipahiling nila ang ilang mga sakyanan lakip na ang ilang (Martinez) mga sakyanan aron mahibaw-an kun si kinsay nagdala kanila og armas.
Apan ang kampo ni Salimbangon nagdumili sa pagparekisa sa ilang mga sakyanan ug ang kapolisan dili usab makapugos niini gumikan kay wala silay dalang search warrant.
Ang standoff milanat hangtud ala-una sa kaadlawon ug nadelatar usab ang dagan sa mga motorista ug biyaherong nangagi padulong sa ro-ro port sa kasikbit nga pantalan.
Pipila ka higayon nga misuway ang kampo ni Salimbangon sa pag-agi sa mga katubhan uban sa Armored Personnel Carrier sa 78th Infantry Battalion apan kanunay silang mababagan sa mga sakyanan sa kampo ni Martinez.
Si Salimbangon nga luwan sa iyang Ford Expedition nga adunay plakang ‘8’ mga alas 6:26 sa sayong kagabhion na kining migawas sa maong sakyanan uban sa iyang private escort nga mga security guard sa GGC Security Agency nga personal nga gi-hire ni Salimbangon uban usab sa kapolisan ug mipahilayo sa maong dapit.
Si PRO-7 Regional Director Chief Supt. Lani-O Nerez ug CPPO director Sr. Supt. Erson Degal personal nga miadto sa maong dapit ala-una sa kaadlawon kagahapon ug maoy nakignegosasyon kang Martinez.
Gipasabot ni Nerez kang Martinez ang mga kaso ug danyos nga posibleng ilang atubangon tungod sa mga nalangay nga mga kargamento sa ro-ro port ug sa mga sibilyang naamong og katanggong.
Si Nerez mipadayag nga posibleng mopasaka sila og kaso batok ni Martinez gumikan sa pagkatanggong usab sa ilang mga sakyanan nga gikinahanglan sa ilang operasyon sa pagmentinar sa kalinaw sa piniliay.
Human sa negosasyon sa heneral sulod sa 30-minutos misugot na ang kampo ni Martinez nga makaagi ang mga natanggong sakyanan nila ni Salimbangon.
Ang kampo ni Salimbangon pinaagi sa ilang abogadong si Atty. Aguida Monteclar mipasabot sa Banat News nga ila nang gituki sa ilang legal team ang posibleng kasong ilang ipasaka batok sa mga Martinez gumikan sa standoff. - BANAT NEWS