Lider gipatay sa Carmen

CEBU, Philippines - Patay ang usa ka political leader samtang girakrakan usab ang balay sa laing political leader diha sa barangay Poblacion, lungsod sa Carmen sa wala mailhing tawo pasado alas 11:30 sa gabii niadtong milabay’ng adlaw.

Ang namatay mao si Jovito Bontia, 53, nga giingong supporter sa incumbent mayor Sonia Pua. Samtang swerteng wala maigo ang lain pang supporter ni Pua nga nagpuyo 100 meters gikan sa balay ni Bontia nga si Manolo Buot kansang balay girakrakan usab.

Matud pa ni Insp. Carlos Reyes Jr., hepe sa kapolisan sa Carmen Police Station dihang nahinabi sa Banat News unang gitirahan ang balay ni Buot sa mga tawong nagmotor.

Si Bontia pagkadungog sa buto-buto migawas kini sa balay aron pagsusi apan wala damhang adunay laing grupong nagmotor gihapon nga kalit nga mibadhas sa atbang sa ilang balay dayong rakrak kang Bontia.

Si Buot kinsa diha sa sulod sa iyang balay atol sa pagpangrakrak wala kini maigo.

Sa pagresponde sa mga kapulisan sa nahitaboan, napalgan ang tulo ka mga kabhang sa M16 rifle ug nabuslot usab ang balay ni Bu-od.

Si Reyes midugang nga ang mga gikatahapan gituohang kauban ra ug dako ang ilang pagtuong may bulok politika ang pagpangrakrak.

Gisuwayan sa pagdala si Bontia ngadto sa Danao City District Hospital apan wala na kini makaabot nga buhi sa maong tambalanan gumikan sa grabeng igo sa mga bala sa iyang lawas.

Padayon pa ang imbestigasyon sa maong insidente sa pagtumbok sa responsable sa nahitabong pagpamusil ug kung kinsa ang nagpaluyo niini. – BANAT NEWS