Kandidato hapit dasmagi

CEBU, Philippines - Usa ka kandidato sa pagka-konsehal sa lungsod sa Cordova misumbong sa kapolisan nga padasmagan unta siya sa multicab sa wala hiilhing tawo didto sa barangay Ibabao, sa maong lungsod niadtong Domingo, bisperas sa election.

Ang biktima nga nangluspad sa kahadlok, mao si Carlos Alo Degamo, kinsa mikandidato pagka-konsehal sa Cordova.

Si SPO3 Teofilo Amodia sa Cordova Police Station mibutyag sa Banat News nga miadto ang biktima sa sports complex uban sa iyang supporter nga si Edcel Berdin.

Dihang hapit na sila moparking sa ilang motorsiklo, nadungog nila ang singgit sa usa ka tawo nga nagsakay sa multicab ngadto sa drayber niini nga padasmagan siya.

Matud pa ni Degamo nga maayo nalang kay wala mosanong ang drayber sa multi cab ug hinuon milikay kini kaniya. – BANAT NEWS