Cebu City hapsay

CEBU, Philippines - Hapsay ug malinawon ang pagbotar sa mga botante sa dakbayan sa Sugbu gawas lamang sa pipila ka aberyang nasinati gumikan sa kahuot, lakip na niini ang mga bukirong mga barangay sa dakbayan.

Si Rudy Gilos ang election officer sa Cebu City North District nga nahinabi sa Banat News kagahapon mitug-an ang mga botante nisulod sa classroom sa Cebu Technological University (CTU) ug wala gyud mopatuo hinungdan nga nalangay og maayo ang mga sakop sa Board of Election Inspectors (BEI).

Giklaro niyang dili hinay ang system sa PCOS machine kundili ang mga tawo maoy dili ma-control nga maoy makamugna og kalangay.

Kagahapon sa alas 3 sa hapon ang PCOS machine sa cluster 68 sa barangay Carreta sa kalit napawong hinungdan daling gidad-an ni Gilos og laing PCOS machine.

Matud ni Gilos nga sukad nianang buntag ang PCOS machine sa Cluster 68 sa Carreta mao pay ilang gipulihan.

Samtang ang kapolisan sa dakbayan mipadayag nga malinawon ang pagpahigayon sa election gawas lang sa panag-ilogay sa mga tawo sa pipila ka presinto aron makakuha og priority numbers.

Hinuon misaler ang crowd control sa mga polis ug napakgang ang tension particular na niini ang nahitabo sa barangay Guadalupe.

Samtang si Ethel Natera sa Visayan Electric Company kagabii nagkanayon nga walay nahitabong brownout sa mga polling areas. Nakadawat sila og pito ka emergency reports apan walay kalabotan sa piniliay. (BANATNEWS)