CEBU, Philippines - Miyaka ang sakyanan sa Commission on Elections (Comelec) sa lungsod sa San Fernando human kini suyaki sa dihang mitungas kini ngadto sa bukirang barangay Basak sa maong lungsod kagahapon sa alas 5:30 sa kabuntagon.
Si Manuel Ologuiber, hingkod, nga taga San Fernando, ug maoy drayber sa sakyanan sa Comelec mibutyag sa kapolisan nga naghatod sila sa mga opisyal nga balota ug uban pang kahimanan para sa eleksyon kagahapon ngadto sa Basak Elementary School nagdungan og hiyos ang duha ka ligid sa iyang sakyanan.
Sa dihang iyang gisusi, nakurat si Ologuiber kay maoy nakita niya ang mga metal spike kon suyak nga nanaroy sa mga ligid sa sakyanan.
Unya gisubay ni Ologuiber ang karsada nga iyang giagian ug didto nakapunit siya og 25 ka mga suyak ug iya kining gidala ngadto sa buhatan sa kapolisan sa San Fernando.
Nagkanayon si SPO3 Marjukin Misuari sa San Fernando Police Station nga wala pa sila’y natumbok nga mga tawo nga maoy nananom sa suyak.
Ang Basak may gilay-ong 12 kilometros gikan sa barangay Poblacion sa San Fernando
Walay nahimo ang mga board of inspectors ug kapolisang mikuyog sa maong biyahe sa pagpanghatod sa mga balota,.
Sa pagkakaron padayon pang giimbistigar sa kapolisan ang maong hitabo. (BANATNEWS)