Namiyesta gihimulbolan sa tulisan

CEBU, Philippines - Nasakiyo sa wala hiilhing mga tulisan ang salapi ug cell phone sa usa ka lalaki nga namiyesta didto sa dakbayan sa Mandaue sa miaging gabii.

Ang biktima mao si Limotsu Masocaso, 18, ulitawo, nga taga barangay Bankal, dakbayan sa Lapulapu.

Si SPO3 Danilo Ibarita sa kapolisan sa Presinto 5 sa Opao Police Station nga nahinabi sa Banat News miingon nga ang biktima gikan pa nga namiyesta sa balay sa iyang higala didto sa dakbayan sa Mandaue.

Gumikan kay nihit na ang sakyanan, naglakaw nalang ang biktima paingon ngadto sa Lapulapu, ug dihang haduol na siya sa 1st Mactan Mandaue Bridge nasugatan niya ang duha ka tawong armado kinsa mition dayon kaniya sa ilang .45 kalibre nga pistola ug gihimulbolan siya sa kuwarta ug cell phone.

Igo nalang sa pagtibi ug pagpanghupaw ang biktima nga misumbong sa iyang kaagi ngadto sa kapolisan. – BANAT NEWS