CEBU, Philippines - Gimando ni Philippine National Police Chief, Director General Jesus Verzosa ang tanang ginsakupan pagpaniid sa vote buying sa precinct level sumala pa sa report sa public information office sa PNP website.
Ang tanang hepe sa kapolisan gimandoang mopakatap og mga field intelligence operatives nga mag- monitor sa mga kalihukan sa mga tawong mamalit og botos ug sa mga tawong mamaligya sa ilang botos.
Lakip na niini kadtong mga tawong modawat og bayad aron dili na lang moadto sa polling precincts aron dili makabotar sa ilang mga kandidato.
“This is currently the most common form of cheating in our election history. Before, candidates would pay voters to vote for them, this time, voters are paid not to vote. In effect, these voters are paid to waive their right to vote,” pasabot pang Verzosa.
Ang kapolisan nakadawat og mga report nga dunay pipila ka mga local political parties nga migamit niini nga taktika aron manikas sa ilang mga kaatbang.
Kini pinaagi sa ‘kinamangay,’ ang mga kandidato mobayad sa mga iladong supporter sa ilang mga kaatbang bugti sa salapi ug dili na lang sila moadto sa polling precinct aron di makabotar.
Ang tigpamaba sa PNP, Chief Supt. Leonardo Espina nagkanayon nga human bayri ang maong mga supporter butangan dayon ang ilang mga tudlo og indelible ink, niining paagiha bisan moadto pa sila sa polling precincts di na gyud sila makabotar tungod kay duna namay ink ang ilang mga tudlo.
Sumala pa ni Espina namonitor na nila ang maong modus operandi sa pipila ka mga dapit sa nasud, apan nanawagan gihapon siya sa publiko nga kun dunay mamatikdang susama niini i-report kini dayon sa kapolisan.
Mahimong i-text ang report diha sa PNP hotline 117, TXT PNP 2920 o ba kaha sa PNP Complaints Unit sa cellphone number 09178475757 o sa labing duol nga Police Station. – BANAT NEWS