10 anyos patay sa aksidente

CEBU, Philippines - Patay ang usa ka 10-anyos nga batang babaye human kini mabanggai og L-300 van niadtong Sabado sa buntag diha sa barangay Lower Lipata, lungsod sa Minglanilla.

Ang biktima giila sa mga polis nga si Kristelle Mae Alipar, residente sa maong lugar kinsa nakaangkon og bali sa walang paa ug grabeng kadaot sa ulo ug lawas.

Ang drayber sa maong van nga nagtangag sa plakang GDE-663 mao si Reynaldo Lareta, 44, residente usab sa maong lugar nga nagtingkagol karon sa Minglanilla police station detention cell.

Si PO2 Avelino Selloria, imbestigador sa nahisgutang aksidente sa pakighinabi niini sa Banat News mibutyag nga ang bata gisugo og papalit og sabon diha sa usa ka tindahan. Si Lareta kinsa gikang nangompra og mga piyesa sa sakyanan nagbiyahe gikan sa national highway paingon na sa ilang motor shop sa Lower Lipata.

Matud ni Selloria nga kusog kaayong mipadagan sa sakyanan si Lareta hinungdan nga naabtan gyud niini ang bata dihang mitabok kini sa karsada. Gibutyag usab ni Selloria nga nabuak ang windshield sa sakyanan ni Lareta tungod kay milupad ang bata human mabanggai ug mibanda ngadto sa windshield una pa nalabay ngadto sa karsada.

Ang bata nalagpot napulo ka metros ang gilay-on gikan sa sakyanan.

Ang bata gidala sa Minglanilla District Hospital apan tungod sa grabeng kahimtang gibalhin kini sa Vicente Sotto Memorial Medical Center apan mga pasado alas 3:00 sa hapon sa maong adlaw nakabsan sa kinabuhi subay sa gitug-an sa igsuon sa bata ngadto sa mga polis. – BANAT NEWS