Vital installation gibantayan sa polis

CEBU, Philippines - Ang mga vital installation sa Sugbo higpit nga gibantayan sa kapolisan aron sa pagpakgang sa mga dautang elemento nga naglaraw nga gub-on ang piniliay ugmang adlawa.

Si Chief Superintendent Lani O-Neres, direktor sa Police Regional Office (PRO) 7 miluwat og kamandoan sa kapolisan nga pabantayan kanila ang mga   taytayan, cell site ug mga linya sa komunikasyon dinhi sa Sugbo.

Nunot niini si Senior Superintendent Noel Gillamac nga maoy direktor sa kapolisan sa Mandaue City Police Offiice (MCPO) miawhag usab sa mga molupyo sa maong dakbayan nga kinahanglang ila dayong isumbong ngadto sa kapolisan ang unsa mang lihok sa mga tawo nga mamatikdan nilang binuang.

Matud pa ni Gillamac nga kinahanglang magmaigmat ug mabinantayon ang mga molupyo batok sa mga tawong gamiton sa mga malditong kandidato ug manghatag og kuwarta nga mini ngadto sa mga botante.

Dugang pa ni Gillamac nga lakip sa higpit nilang gibantayan mao ang Marcelo Fernan Bridge ug 1st Mactan Mandaue Bridge nga nagdugtong sa dakbayan sa Mandaue ug dakbayan sa Lapulapu.

Gibantayan usab ang mga oil depot sa barangay Looc, sa Mandaue ug mga oil depot sa Lapulapu ug uban pa.

Si Chief Inspector Bonifacio Tecson,   nga nahinabi sa Banat News miingon nga ang 68 ka mga polling precinct sa dakbayan pulos na may mga gidestinong polis nga mobantay sa mga Precinct Count Optical Scan (PCOS).

Si SPO4 Gaspar Magdadaro sa kapolisan sa dakbayan sa Lapulapu nga nahinabi sa Banat News miingon nga 71 ka mga Field Training Police (FTP) ang gidugang sa 166 ka mga regular nga sakop sa kapolisan sa nahisgotang dakbayan.   (BANATNEWS)