Konsehal nga kandidato sa ronda gidakop human malutsi og warrant

CEBU, Philippines - Usa ka incumbent municipal councilor nga nagpapili og balik ang nasikop sa miaging gabii human nalutsan og warrant of arrest tungod sa utang nga bracelet nga nagkantidad og di momenos P100 mil.

Si municipal councilor Roel Carreon, taga Liboo, lungsod sa Ronda ang gisikop sa kapolisan sa Ronda human sila makadawat og warrant of arrest nga giluwat ni Regional Trial Court (RTC) Branch 5 Judge Douglas Marigomen.

Nasayran nga pasado alas-7 sa miaging gabii gi-served ang warrant of arrest ni Carreon diha sa ilang panimalay.

Sa pakighinabi sa Banat News kang Carreon kini mipasangil nga fabricated ang complainant tungod kay wala siya makaila ni Ramon Garcia nga maoy mipasaka og kaso kaniya.

Matud pa ni Carreon nga base sa maong complaint makatulo na siya gipadad-an og notice sa ilang panimalay dinhi sa syudad sa Sugbo diin napatik na ang iyang pirma apan iyang gikatingala nga lahi ra kaayo ang iyang pirma sa notice of receipt nga gipadala.

Butyag pa ni Carreon nga nahiubos usab siya sa fiscal tungod kay wala una sutaa kun pirma ba gyud niya ang napatik sa notice nga nadawat.

Apan matud pa ni Carreon nga wala gyud siya makaila ug makahinumdum nga nakautang siya.

Dako usab ang iyang gikatingala og nganong karon pang panahon sa election siya mahatdan og warrant of arrest.

Si Carreon mipiyansa kagahapong adlawa kini aron makapadayon siya pagpahigayon og pagpangampanya.

Dugang pa ni Carreon nga aduna siya’y mga pagduda nga ang ilang kaatbang sa politika maoy nagbuhat-buhat sa ingon   aron siya dauton.

Apan hugot ang iyang pagtuong dili gyud makatarog ang iyang kaatbang sa politika bisan paman og gihimo-himoan siya og estorya, sumala pa niini dili lang kini ang unang higayon nga gibuhatan siya og sala ug gipapriso.

Niadtong buwan sa Marso mipiyansa usab siya tungod sa kasong hit and run nga gipasaka na usab batok kaniya ug wala siya masayod kun si kinsa ang iyang nadasmagan.

 “Gi-cripple ko nila kay molihok baya gyud ko ilabi na sa mga barangay,” matud pa ni Carreon.

Gihulagway usab ni Carreon nga grabeng harassment ang nahitabo sa ilang lungsod kini tungod kay adunay ubang mga residenteng anaa na mipuyo sa kalibunan tungod sa kahadlok.

Si Carreon ang nagpapili og balik sa pagkakonsehal sa ilang lungsod ubos sa partidong Liberal Party.   (BANATNEWS)