Ruiz 'labaw na kang Cortes sa survey

CEBU, Philippines - Si Mandaue City mayoralty candidate sa dakbayan sa Mandaue Kong. Nerissa Soon-Ruiz nangangkong milabaw na sa survey batok sa iyang kaatbang nga si Mayor Jonas Cortes.

Gihulagway ni Ruiz nga sa pagsugod pa sa pagpangampanya, kanunay lang silang magtabla apan sa labing uwahing survey sa Mandaue Business Group milabaw na siya og otso porsiyento.

Ang Mandaue Business Group Survey mipakita nga si Nerissa nakakuha og 53 porsiyento samtang si Jonas Cortes nakakuha og 45 porsiyento.

Ang survey gipahigayon niadtong Mayo 2 hangtud sa Mayo 4. Kini naglangkob sa 1500 ka mga respondents, dos porsiyento sa mga respondents undecided.

“Sa pagsugod sa kampanya, statistical tie pa mi ni Jonas sa mga survey. Karon nga naglabaw na ko og walo ka puntos, klaro na ang kadaugan. Klaro nga ang taga Mandaue naka-amgo nga walay nahitabo sa Mandaue sulod sa termino ni Jonas,” matud pa ni Ruiz.

Dugang pa ni Ruiz, sukad sa paglingkod sa pagkamayor sa maong dakbayan ni Jonas dugay na kining namakak sa katawhan sa Mandaue ug wala mapatuman ang mga kaayohan alang sa dakbayan.

Usa na niini ang mga kanal nga wala pa gihapon masulbad, ang trapik ug gubaong mga kalsada bisan paman sa P2.8 bilyones nga naaprubahang budget sa konseho alang sa iyang mga proyekto.

Kahinumduman nga mipahibalo si Cortes nga iyang gahinan og P1.2 bilyong budget alang sa mga proyekto sa syudad kun ugaling siya ang makadaog sa umaabot nga piniliay.

Giklaro usab sa kampo ni Cortes sa milabay’ng interbyu kang city administrator Briccio Boholst nga bisan paman sa mga pagbabag ug maniobra sa konseho nakapadayon ang siyudad sa paglambo ug nakaagni gihapon og investors.

Gisaway ni Ruiz ang giingong tunga sa bilyon ka pesos nga sweldo sa 2,300 ka mga job-order employees aron makasiguro sa kadaugan karong eleksyon nga mobalor og tunga sa bilyon sulod sa tulo ka tuig samtang P71milyones lamang ang gitagana ngadto sa 27 ka mga barangay nga mi representar sa 300,000 ka mga residente.

Nanawagan si Ruiz sa tanang Mandauehanon nga magmabinantayon sa posibleng pagpanikas nga mahitabo karong piniliay.   (BANATNEWS)