Watershed sa Sudlon II padayong giopawan

CEBU, Philippines - Usa ka non-governmental organization   nananom og mga kahoy alang sa reforestation sa sitio Maraag sa barangay Sudlon II gumikan sa padayong pagpamutol ug pagpangsunog sa ilang mga tinanom nga kahoy sa maong dapit.

Si Elizabeth Corro sa pakighinabi sa mga tigbalita kagahapon mibutyag nga protektado unta sa gobiyerno pinaagi sa Department of Environment and Natural Resources ang 31.74 ektaryang watershed sa maong dapit nga gisugdan pagpananom sa mitaliwang pastor nga si Nelson Garcia niadtong 1995.

Mitaliwan si Garcia niadtong 1998 ug wala matiwas ang kontratang 25 ka tuig niyang ugmaron ug palabungon ang kakahuyan sa maong lugar ug tungod sa pagkawala niini gikanselar usab ang kontrata.

Si Corro nga sakop sa organisasyon ni Garcia mi-apply uban sa grupong Sudlon Hills Bio-Diversity and Conservation Park aron sila’y mopadayon sa reforestation.

Apan mireklamo karon si Corro nga samtang gipaabot pa ang pag-aprubar sa ilang aplikasyon diha nay usa ka pribadong kompanya nga nag-operate og piggery sulod sa kasikbit nilang watershed area (ngan ug pangalan sa kompanya gipugngan hangtud di kakuhaan og pamahayag bahin niini) nga giprubahan na, nasayran nga sa wala pa makanselar ang kontrata ni Garcia, misumitir nang daan og aplikasyon ang maong kompanya.

Matud pa ni Corro ilegal kini sanglit base sa proseso di mahimong modawat ug labaw nang makaaprubar og bag-ong aplikasyon ang DENR kun dili pa hingpit makanselar ang kasamtangang kontrata.

Ang maong kompanyang gikwestyon nag-operate na og piggery ug greenhouses diha sa tupad nga reforestation area sulod sa pipila na ka tuig bisan wala pa maaprubahi ilang aplikasyon. Gidili sa mga watershed kon protected areas sama sa kalasangan ang pagtukod og mga edipisyo ug pagkoral palibot niini apan si Corro mipakita og mga litratong duna gyuy daghang edipisyong gitukod ug orchards diha sa maong lugar.

Niadtong Abril 23, ang mga sakop ni Corro nakasakop og tawong nag-uling sa maong lugar ug mitug-an kinsay mga nalambigit apan giingong ang mga testigos ug si Corro na hinuon karoy gikiha og arson sa DENR. - BANAT NEWS