Manual counting giduso kun ...

CEBU, Philippines - Dili motugot ang Noynoy-Mar Volunteers Movement dinhi sa Sugbu nga iuswag ang piniliay karong Lunes sa laing petsa human ang chairman sa Commission on Elections (Comelec) nga si James Gimenez mipadayag kagahapon nga 30 porsiyento lamang mahinayon ang eleksyon.

Giduso karon sa grupo ang manual counting kun mapalpak man ang poll automation aron lang pagsigurong mahinayon ang piniliay.

Kagahapon sa buntag mipatawag og press conference ang Noynoy-Mar Volunteers pinangulohan ni Atty. Democrito Barcenas uban nila si Atty. Augosto Go, kanhi chief justice Hilario Davide Jr., Dr. Potenciano Larrazabal, Ben Dapat ug Fr. Carmelo Diola sa Dilaab Foundation nanawagan nga kinahanglang mahinayon gyud ang eleksyon sa Lunes.

Si Go sa iyang bahin misugyot ngadto sa Comelec nga bisan kun 30 porsiyento lamang kinahanglang duna sila’y backup system unta sa higayon nga dunay aberya bisan ipaagi nalang sa manual.

Si kanhi chief justice sa Korte Suprema Hilario Davide Jr. dakong supak nga isibog tungod kay mas dako ang kahigayonang dunay tikas nga mahitabo kun ipaagi nalang sa manual voting ang eleksyon.

Apan mipasalig si provincial Comelec supervisor Marco Lionel Castillano nga kun duna may maaberyang makina ang nahisgutang presinto lamang maoy maapektahan. Gipaabot usab nga moabot ang flash cards karong petsa 8 ug 9. – BANAT NEWS