Odilao gihulga sa text

CEBU, Philippines - Si kanhi district customs collector ug kandidato sa ANAD Party list David “Boy” Odilao nakadawat og mga hulga sa iyang kinabuhi pinaagi sa text.

Base sa imbestigasyon ni SPO1 Oliver Dacua, si Odilao unang nakadawat og mensahe sa text niadtong Abril 27, 2010 sa alas 7:43 sa gabii nga nag-ingong “pahimulos ka husto mangilad ka maayo sa imo gibuhat pagsamok-samok sa ANAD ‘kaw tigulanga ka. Magmahay ka, tago maayo gukdon ta ka bisan asa ka magtago.”

Ang numero sa sim card nga gigamit sa maong texter mao ang 639061722826. Nasundan kini niadtong Mayo 2, 2010 sa gabii nga “maayo gabii kuya ayaw kompiyansa may kuno ipapatay ka bago mag-election,” gikan sa laing numero.

Mayo 3, 2010 sa alas 7:32 sa buntag si Odilao nakadawat na usab og mensahe sa text nga nagkanayon “gabii ikaw ang target nag-alangan sila ni Rose kay daghan ma’g tawo ug naa pa gyod mga sakop na mga mamatay tao, gabii nahuman ilang meeting concerned lang ko kay kabalo ko wala kay sala,” sumala sa ikaduhang texter nga daw midapig kang Odilao.

Si Odilao dihang gipangutana sa Banat News nagdumili sa pagbutyag sa tawo nga iyang gidudahan nga maoy mihulga kaniya apan nagdudang may kalambigitan kini sa politika. – BANAT NEWS