'Killer' ni Tata Negro igo lang gisugo

CEBU, Philippines - Ang gitumbok nga nagpusil-patay sa gidudahang druglord nga si Crisistomo “Tata Negro” Llaguno mipasangil nga usa ka gihinganlan og “Rendo Chavez” ang nagkuha kaniya sa ilang lugar sa Siaton, Negros Oriental aron ipapatay ang kontrobersiyal nga kandidato pagka-konsehal sa siyudad.

“Pasaylo-a ko!” maoy hangyo sa suspetsado nga si Jimmy Diala samtang nagluhod sa karsel nga gikonprontasi sa asawa ni Llaguno nga si Lizel.

Matud ni Diala sa dihang gipresentar sa mga sakop sa media nga si Chavez mikumbinser kaniya sa pag-anhi sa siyudad aron patrabahuon isip construction worker nga magsuweldo og P180 ang adlaw.

Martes sa miaging semana, sulod sa usa ka pension house sa dalan Rahman, gipugos siya ni Chavez nga ipapatay si Llaguno. Dali siyang mibalibad, apan gibaharan siya ni Chavez nga patyon siya ug iyang pamilya kun magdumili sa pagtuman.

Si Diala adunay upat ka mga gagmay’ng anak.

Matud ni Lizel ngadto sa mga tigbalita nga kun druglord iyang bana, dili unta siya manghangyo sa mga doktor nga i-release ang lawas sa iyang bana bisan wala pay bayad ug dili usab siya maglisod pagpangita og lungon alang niini.

Si Chief Insp. George Ylanan, hepe sa Investigation and Detection Management Bureau, miingon nga padayon pang gipangita ang kuyog ni Diala nga “stopper” kon tigtug-an sa lokasyon ni Llaguno atol sa iyang pagpangampanya sa Lorega.

Si Llaguno giingong gipusil ni Diala samtang milamano kini ngadto sa mamumuno.

Adunay report nga ang pistola nga gigamit ni Diala usa ka “government-issued” firearm, ug si Ylanan mikonpirmar nga rehistrado ang maong armas apan susihon pa sa Firearms Explosives and Security Administration Group-7 kun kinsay nanag-iya niini.

Si Ylanan nagkanayon nga i-validate usab nila ang text message nga mikatap nga “well-planned” ang pagpusil kang Llaguno tungod kay ang mga druglord sa siyudad nakig-meeting sa usa ka kapitan sa usa ka tigbakayan sa barangay Pasil usa ka adlaw sa wala pa patya ang kandidato.

Si kanhi Senador Sonny Osmeña mipadayag nga mas mouyon siya kun ang National Bureau of Investigation (NBI-7) ang mo-imbestigar sa kasong pagpatay kang Llaguno.

Si Ylanan sa iyang bahin nagkanayon nga andam silang mokooperar kun ang NBI-7 ang pa-imbestigahon sa insidente.

Ang NBI-7 nakadawat na sa hangyo ni Osmeña nga sila ang pasusihon sa krimen.Ang igsuon ni Llaguno nga si Carry Llaguno naglaraw nga mohulip sa iyang igsuon pagkakandidato pagka-konsehal sa siyudad.

Apan si Commission on Election-7 Attorney Enerio Ocariza nagkanayon nga dili mahimo ang gihangyo ni Carry tungod kay si Tata Negro usa ka independenteng kandidato ug walay partido.

Tungod sa nahitabo ni Llaguno, ang standard bearer sa Kugi Uswag Sugbo nga si Alvin Garcia mipahibalo nga gikanselar ang gitakda na unta nilang mga pulongpulong alang sa ilang seguridad.

Gani, nanawagan si Garcia ngadto sa kapolisan ug ni Mayor Tomas Osmeña sa paghimo og patas ug tinuoray nga imbestigasyon aron mahibaw-an ang utok sa krimen.

Giangkon ni Garcia nga si Bise Mayor Michael Rama nga gipasanginlan sa kandidato pagka-konsehal Jimboy Tionko nga adunay kalambigitan kang Llaguno isip druglord, maoy nakabenepisyo sa hitabo.

Giklaro hinuon niya nga wala siya magtumbok kang Rama nga utok sa krimen. – BANAT NEWS