100 supporter ni Guardo nibali sad kang Mayor Osmeña
CEBU, Philippines - Duha ka adlaw human ipresentar ni congressional aspirant Jonathan “Atan” Guardo sa media ang 15 supporters ni Mayor Tomas Osmeña nga mibalhin kaniya, nakabawos usab ang mayor human 100 ka kaalyado ni Guardo sa barangay Pasil mipadayag kagahapon nga gitalikdan na nila si Guardo.
Ang maong mga kanhi supporter ni Guardo mipadayag nga adto na sila modapig kang Osmeña. Ang barangay Pasil gikunsiderar nga balwarte ni Guardo sanglit kaalyado sa oposisyon si barangay kapitan Romeo Ocarol. Niadtong 2007, si Cong. Antonio Cuenco napilde diha sa barangay Pasil, apan si kanhi barangay kagawad Mario Bitang nagkanayon nga kadaghanan sa mga misuporta kaniadto kang Guardo mibali na karon kang Osmeña. Lakip sa mibalhin kang Osmeña mao ang pag-umangkon ni Ocarol nga si Jocelyn Almacen.“Gawas sa mga karaang supporters sa BOPK, napun-an g’yod kay daghan mi nga gikan sa kampo ni Atan nga dia na kang Tommy,” pangangkon pa niini.
Ang mayor nangangkon nagkadaghan sa mga supporter sa Kusug gikan sa kabarangayan ang mitapon na kanila.
“Ulahi na ang gimmick. Ila ra man nang supporter nga ila gipagawas nga namali. Nasayod na ang katawhan, gusto sila healthy. At the same time they want change so that panginabuhi og trabaho ang unahon to fight poverty through microfinance,” dugang pa sa pamahayag ni Guardo nga gipadala dinhi sa Banat News. – BANAT NEWS
- Latest
- Trending


















