Rerouting ipatuman sa Tipolo bridge

CEBU, Philippines - Ipatuman sa Mandaue City Traffic Management Board (MCTMB) ang kausaban sa rota sa mga sakyanan ug pagdili sa mga trak sa maong dakbayan karong Mayo 17, inigsugod sa trabaho sa Tipolo bridge.

Matud pa ni Engr. Mariano Ostia Jr. executive director sa MCTMB nga ang trabaho molanat og unom ka buwan.

Ubos sa rerouting scheme, ang tanang jeep pasaheroan nga may plate number nga paris ug dili paris ang katapusang numero magsal-ang-sal-ang sa pag-agi sa MC Briones street.

Ang kausaban sa rota maglangkob sa Cebu Doctors University ug Parkmall ug uban pang establisamento sa reclamation area nga misamot na ka umento sulod sa administrasyon ni Mayor Jonas Cortes.

Matud pa ni Ostia nga ang pagdili sa mga dagkong trak sa pag-agi sa maong dapit makatabang kaayo sa pagpaluag sa dagan sa trapiko ilabi na nga himoon nalang nga usa ka lane ang agianan sa mga sakyanan samtang magpadayon pa ang trabaho. – BANAT NEWS