Gwen mireklamo batok sa gihimong Tomas

CEBU, Philippines - Gitinuod ni Gob. Gwendolyn Garcia ang pagsang-at og reklamo ngadto sa COMELEC batok sa gibutang sa dakbayan sa Sugbu nga “reflectorized signages” sa South Road Properties nga nag-atake sa gobernadora pinaagi sa paglambigit kaniya sa kontrobersiyal nga pagkapalit sa P98 milyones nga Balili property diha sa barangay Tinaan dakbayan sa Naga.

Ang legal counsel ug spokesperson sa One Cebu Party nga si Atty. Rory Jon Sepulveda maoy mihatod sa reklamo ngadto sa buhatan ni Provincial Election Supervisor Atty. Lionel Marco Castillano kagahapon sa buntag.

Si Sepulveda miawhag kang Castillano nga mohimo og imbestigasyon kang Mayor Tomas Osmeña ug mga opisyales sa siyudad sa Sugbu tungod sa pagtaod og ubay ubay nga election propaganda billboards o signages sa SRP nga nagdaot sa gobernadora ug sa Kapitolyo nga gihulagway sa Kapitolyo nga kalapasan sa “prohibited forms of election materials” sa Election Laws.

Nasayran nga si Mayor Osmeña mipahibawong mibutang siya og “reflectorized billboards” sa SRP nga nagtangag og mensaheng “This way to the SUP (South Underwater Properties) 19 km,”, “Your Provincial Taxes at Work” ug “A Proud Blunder of Gov. Gwen Garcia, 'I'm sorry’” agi og tabang sa kandidatura ni Liberal Party gubernatorial candidate Hilario ‘Junjun’ Davide III.

Matud pa ni Sepulveda nga ang maong signage gihimo sa mayor gamit ang pundo sa gobiyerno, gibutang sa propiyedad sa gobiyerno nga usa ka dakong kalapasan sa mga probisyon sa Fair Election Law.

Gipangayo sa partido sa Comelec nga mandoan ang dakbayan pagpatangtang niini sa labing daling panahon ang signages tungod kay lima na lamang ka adlaw og election na. – BANAT NEWS