Katabang milayat sa 1st bridge

CEBU, Philippines - Miambak sa 1st Mactan Mandaue Bridge habig sa barangay Pajo, dakbayan sa Lapulapu ang usa ka katabang sa panimalay alas-11 pasado ang takna sa miaging gabii apan swerteng naluwas.

Ang biktima mao si Maria Elisa Mahusay Gasalao, katabang sa usa ka panimalay diha sa Doña Rita Village sa Talamban ug lumad nga taga barangay Ibabao sa Cordova.

Si SPO3 Rex Ybañez miingon nga wala pa nila kakuhai og pamahayag ang babaye tungod kay hangtud karon dili pa kini makasulti.

Ang maong babaye kinsa gidala sa Mandaue City District Hospital ang nakabaton og samad sa bukobuko ug gituohang nakabaton usab kadaut sa kabukogan sa pag-ambak sa taytayan nga mokabat sa 50 ka tiil ang gihabugon.

Ang mananagat nga nakasaksi pag-ambak ni Gasalao miingon nga naghapla pagtugpa sa dagat sa Mactan Channel ang babaye ug dali nila kining gipahibalo sa mga barangay tanod sa maong dapit kinsa maoy nagtinabangay pagpangita niini.

Si Gasalao nga nawad-an na og panimuot didto na mapalgi sa habig sa barangay Looc, dakbayan sa Mandaue ug gidali nila pagdala sa nahisgutang tambalanan. (BANATNEWS)