Katoliko suporta kang Cortes

CEBU, Philippines - Onse ka mga bag-ong gitukod nga grupo ang milangkob sa alyansa sa mga Romano Katoliko sa Mandaue nga moabin ni Mayor Jonas Cortes sa kalihukan pagbatok niadtong mga kandidato nga misuporta sa balaodnong pabor sa aborsiyon ug pagtudlo sa sex sa mga kabataan sa grade 5.

Gilaraw ni Cortes nga motudlo og temporaryong coordinator sa bag-ong alyansa nga gitawag og Hiniusa sa mga Nagpakabanang Romano Katoliko (Hi-Naroka) gikan sa bagang duot sa katilingbang Manduehanon nga taga-urban poor.

Ang Hi-Naroka ubos usab sa umbrella organization sa kampo ni Cortes nga gitawag og Supak kon Simbahan ug Urban Poor Alang ni Kristo.

Gilangkuban sa mga bag-ong natukod nga kapunongan sa Nagpakabanang sakop sa Oasis of Love, Nagpakabanang sakop ni Mama Mary, Nagpakabanang sakop sa Confradia, Nagpakabanang sakop sa Knights of Columbus, Nagpakabanang sakop sa Couples of Christ, Nagpakabanang sakop sa Singles for Christ, Nagpakabanang sakop nga relihiyosong Romano Katoliko, Nagpakabanang Katoliko sa Mandaue, Nagpakabanang mga Kristohanon ug uban pa.

Namugna ang maong mga kapunongan isip tubag sa awhag ni Cortes nga hugtan nila ang kampanya batok niadtong mga kandidato nga mipaluyo sa Reproductive House Bill 5043 nga gitumbok sa simbahang Romano Katoliko nga supak sa kalihukang pro-life ug wala mosunod sa lagda sa mga Kristohanon nga dili mopatay sa kaugalingong anak nga anaa sa sabakan sa mga inahan kon aborsiyon.

Si Cortes sa usa ka pamahayag nga gipadala ekslusibo sa Banat News nagkanayon nga ang bag-ong natukod nga kapunongan maoy tubag sa awhag sa kaparian nga hugtan ang pagpili sa mga kandidato nga dunay sinsirong pagtuo sa Kahitas-an pinaagi sa pagsupak sa nahisgutang balaodnon nga kontrobersiyal ug gisupak sa relihiyosong Romano Katoliko.

Midugang pag-ingon ang mayor nga sugdan ugmang adlawa ang mga kalihukan sa pagtukod sa mga barangay chapter sa Hi-Naroka ug sa Supak pagseguro nga dili masudlan ang City Hall sa mga kandidatong masinupakon sa atong relihiyon.

Mga kalihukang relihiyoso sama sa vigil ug dawn rosaries ug uban pang matang sa pag-ampo alang sa kalamboan sa katuyoan sa simbahan ug sa kagamhanan lokal ang gitinguhang himuon, matud pa ni Cortes.   (BANATNEWS)