Espina mipaandam sa taga Cebu

CEBU, Philippines - Unom ka adlaw sa dili pa ang eleksyon ang kanhi gobernador sa Sugbu nga si Rene G. Espina miawhag sa mga Sugboanon nga gamiton ang ilang huna-huna sa pagpili sa mosunod nga pangulo sa nasud.

Ang 80-anyos nga si Espina kinsa maoy labing batan-ong nahimong gobernador sa lalawigan niadtong 1963 ngadto sa 1967, nagkanayon sa press conference kagahapon nga daghan kaayong giatubang nga problema ang nasud karun ug kinahanglang ang pilion sa katawhan mao ang usa ka presidente nga dunay katakos modala sa nasud tungod sa eksperensya.

Ang kanhi gobernador nga nahimong senador kaniadto, mitug-an nga sakop siya kaniadto sa Nacionalista Party ug siya nalang usab ang nahabilin sa ilang batch sanglit sagad sa iyang mga kaalyado mipanaw na. Si Espina miangkong misuporta siya kang Manny Villar tungod kay kini maoy haom nga kandidato pagkapangulo.

Matud ni Espina gikinahanglan kaayong timbang-timbangon sa katawhan si kinsa ang ilang pilion.

Dugang pa niya nga mag-unsa man kun nakatanom na sa kasing-kasing ug hunahuna si kinsa ilang pilion nga presidente karung eleksyon sa Lunes kun ang ilang mapili dili takos pagdumala sa nasud. – BANAT NEWS