Mar mipasalig sa mamumuo

CEBU, Philippines - Gipasalig ni Senador Mar Roxas nga kun modaug siya sa pagka-bise presidente uban ni standard bearer Benigno “Noynoy” Aquino III sa Liberal Party, haw-ason nila ang mga kabus gikan sa kalisud sa kahimtang niini.

Ang maong pasalig gihimo ni Roxas atol sa pagsaulog sa Adlaw sa Pamuo didto sa kaulohan niadtong Sabado nga gitambungan sa mga grupo sa mga mamumuo nga sakop sa Workers for Aquino Roxas (WAR).

Ang WAR mipasalig nga ibubo nila ang ilang katibuk-ang suporta sa kandidatura nila ni Mar ug Noynoy sa Mayo 10 nga election, gilangkoban sa unom ka labor union nga mao ang Philippine Association of Free Labor Unions (PAFLU), Alliance of Filipino Workers (AFW), Union of Filipino Workers(UFW), Construction Workers Solidarity (CWS), Workers Welfare Watch- Philippines (WWW-PH), Ladies Garments Textile Workers Welfare Association (GATWEL) ug ang National Labor Union.

Sa iyang pagpamulong atubangan sa kaliboan ka mga sakop sa WAR, gipadayag ni Roxas nga sa administrasyon unya nila ni Noynoy, tanang Pilipino nga walay trabaho, hatagan nila og trabaho aron maluag ang panginabuhi sa tanang pamilyta sa nasud.

Matud pa ni Roxas nga gamiton niya ang tanang niyang kasinatian sa pagdala sa kagamhanan sukad niadtong nahimo siyang Kongresista sa Capiz, nahimong Kalihim sa Department of Trade and Industry ug ang iyang pagka-senador.  – BANAT NEWS