CEBU, Philippines - Ang kontrobersiyal nga independenteng kandidato sa pagkakonsehal sa siyudad sa Sugbu nga si James Philip “Jimboy” Tionko mihagit kang Bando Osmeña Pundok Kauswagan standard bearer Vice Mayor Michael Rama nga magdungan sila sa pagpa-drug test.
Kini aron mapamatud-an sa katawhan kun si kinsa kanilang duha ang tinuoray nga naggamitan og ginadiling drugas.
Giklaro hinuon ni Tionko nga wala niya akusahi si Rama nga naggamitan kini og ginadiling drugas sanglit wala pa siya’y igong basehanan sa pagtumbok niini apan aron maklaro sa publiko kun tinuod ba siyang tiggamitan og ginadiling drugas magpa-drug test siya uban niini.
Ang gipalanog nga hagit ni Tionko bunga sa gibalos nga alegasyon sa pamilyang Rama nga Tionko usa ka “drug addict” tungod sa pagdeklarar ni Tionko kang Rama nga “public enemy number 1” ug gipasanginlan niya ang bise mayor nga protektor sa drug dealer ug gambling lord.
Si Tionko nga gikiha ni Rama og kasong libelo tungod sa maong pasangil sa interbyu sa DyRF nibahakhak og katawa dihang gikuhaan og reaksyon sa alegasyon sa pamilyang Rama nga usa siya ka drug addict.
Matud pa ni Tionko nga wala nay lain pang nakit-ang ikatubag sa iyang alegasyon ang mga Rama.
Si Tionko gusto nga blood sample ug dili urine sample ang gamiton sa drug testing kun motugot ang bise mayor. – BANAT NEWS