Igsuon ni Gwen gihulga?

CEBU, Philippines - Mayoral candidate sa lungsod sa Dumanjug nga manghod ni Gob. Gwendolyn Garcia midangop sa buhatan sa kapolisan ug misumbong sa kapolisan nga adunay mga kadudahang tawong nagsunod-sunod kaniya niadtong Martes sa gabii, samtang supporter ni Garcia sa Argao girakrakan.

Si Nelson Garcia, nagpa-blotter sa kapolisan kabahin sa tulo ka tawong iyang nabantayang kadudahan og mga lihok nga gidudahan niyang sinugo sa iyang mga kaatbang.

Sa reklamo ni Garcia, niadtong Abril 25 nakigtagbo siya sa kaalyado sa ilang panimalay sa barangay Ilaya dihang ilang nabantayan ang puti nga motorsiklong nagpunay og bahis-bahis sa ilang panimalay tulo ka higayon.

 Ang tulo giingong kanunay makit-ang kuyog sa iyang mga kaatbang sa politika nga magtak-in og armas.

“The victim wanted to put the incident information on record, so that whatever will happened to him, this people mentioned in this blotter will be held responsible,” sumala pa sa certification nga giluwatan ni Sr. Insp. Rodrigo Giangan ang hepe sa kapolisan sa Dumanjug.

Sa laing bahin, usa ka giingong supporter sa gobernador ang swerteng nakaambak sa dagat human rakraki ang awto niini diha sa Boulevard sa barangay Tulic sa Argao niadtong milabay’ng gabii.

Midangop sa kapolisan sa Argao ang mga nangangkong supporters sa gobernador nga sila si Jay Raymund Piñero, 33, Oliver Garcia ug Frederick Banagbang human girakrakan sa nagmotorsiklong lalaki diha sa Boulevard, barangay Tulic. Ang tulo nagkaon sa kan-anan sa maong dapit dihang gisugo ni Garcia si Piñero pagkuha og kwartang ibayad diha sa awto dihang kalit nga miabot ang llalaking nagmotorsiklo ug mirakrak kang Piñero.

Si Piñero nakaambak sa dagat ug wala maigo apan ang awtong Mitsubishi Lancer nangabuslot ang windshield ug hood sa igo sa bala.   (BANATNEWS)