Palcuto uyon armasan ang mga tanod

CEBU, Philippines - Ang independenteng kandidato sa pagkabise mayor sa siyudad sa Sugbu nga si retired Col. Rico Palcuto dakong uyon nga armasan ang mga barangay tanod dinhi sa Sugbu sanglit makatabang kini sa pagsumpo sa krimen sa kabarangayan.

Matud pa ni Palcuto sa round table discussion sa The Freeman ug Banat News niadtong milabay’ng adlaw, angayang armasan ang mga barangay sanglit kabahin naman sila sa criminal justice system sa nasud ug naghimo usab sa mga trabaho nga iyaha sa mga sakop sa kapolisan.

Si Palcuto, kinsa nagserbisyo sa kapolisan sulod sa 40 ka tuig miingon nga iyang nakitang dako ang papel sa mga barangay tanod sa pagpatunhay sa peace and order dinhi sa Sugbu.

Misaad sa Palcuto nga sa higayon nga mapili siyang bise mayor sa siyudad unahon niya ang pagpanday og lokal nga balaudnon alang niini aron may ikasukol sa mga kriminal.

Laing saad ni Palcuto mao ang pagsumpo sa vigilantes ug pagpahawa sa mga kriminal ilabi na sa mga grupo sa mga batan-ong sakop sa mga bayolenteng gangs.

Giklaro usab ni Palcuto nga bisan siya usa ka independenteng kandidato ug dili kaayo haneting manulti og Cebuano apan masaligon siyang dako ang iyang kahigayunan nga makadaog sa umaabot nga election.

Ang 71-anyos nga si Palcuto usa sa nakahatag kaniya og kasiguruhang modaug mao ang dakong suporta ni Crusade Against Violence national vice president Thelma Chiong ug ubang mga nagpakabanang sector nga gusto og hugot nga seguridad dinhi sa dakbayan.

Si Palcuto miingon nga gawas sa iyang peace and order program buot usab niyang palambuon ang ekonomiya sa siyudad apan iya ra kining iyagyag sa higayon nga makalingkod na siya sa konseho sa Cebu City. (BANATNEWS)