Polis nga 'nanion' wala didto

CEBU, Philippines - Gihimakak sa kapolisan sa Boljoon ang pasangil sa usa ka barangay kagawad nga gitiunan sila sa polis nga pag-umangkon sa kandidato sa pagkamayor sa maong lungsod.

Si SPO4 Crispino Uraca, deputy chief sa kapolisan sa maong lungsod sa pakighinabi sa Banat News mikumpirmar nga mireklamo sa ilang buhatan si barangay San Antonio kagawad Nenita Endrina ug bana niining si Eugenio Endrina ug namasangil kang PO1 Ariel Derama nga nanion kanila og armalite niadtong Huwebes sa gabii diha sa sitio Kalub sa barangay San Antonio.

Matud pa ni Uraca, si Derama wala mokuyog sa foot patrol pinangulohan ni Sr. Insp. Edward Villarin niadtong tungura sa maong barangay sanglit kini maoy building guard niadtong adlawa.

Ang didto mao sila si SPO4 Emmanuel Villareal, SPO3 Edgardo Felicis ug PO1 Fortunato Batucan, matud pang Uraca si Batucan maoy miduol sa mga reklamante nga nagmotor niadtong tungura kauban ang pag-umangkong si Leny Sepiar.

Sumala pang Uraca naka-sling ang armalite ni Batucan apan wala gyud sila pangtiuni, ug gihangyo lang nga ipaisa ang t-shirt apan giklaro ni Uraca nga walay pugsanay nga nahitabo.

Mipasangil hinuon si Uraca nga daw nakainom ang mga reklamante dihang gipara sa mga polis ug wala usab magpaila sa iyang kaugalingon si Endrina nga opisyal kini sa barangay.

Ang kagawad dihang gikahinabi sa Banat News niadtong Biyernes mipasangil nga gitiunan sila ni Derama og armalite ug gipahubo ang t-shirt nga may printa sa pangalan sa kaatbang sa pagkamayor sa iyaan sa maong polis.   (BANATNEWS)