Lakas magtigom karon

CEBU, Philippines - Ang mga miyembro sa Lakas-Kampi-CMD mopahigayon karong adlawa og joint meeting didto sa Marco Polo Plaza aron pagpakita sa ilang hugot nga suporta ni presidential candidate Gilberto Gibo Teodoro sa administrasyon.

 Tambungan kini sa 101 ka kongresista, 30 ka mga gobernador, ug 12 ka mga kandidato sa pagka-gobernador, sumala ni Gobernador Eduardo “Eddie” Plaza sa Agusan kinsa maoy   Pangulo sa Governors League of the Philippines.

 Si Plaza kinsa mibisita sa buhatan ni Gov. Gwen Garcia kagahapon nagkanayon nga mamirma na usab sila og manifesto nga tumanon nila ang ilang gisaad nga ihatag ang tanang boto nga gikinahanglan alang sa kadaogan ni Teodoro.

Si Plaza mipasabot nga dili sila motuo sa mga survey nga nanggawas kinsa naghatag lang og pabor kang Senador Benigno “Noynoy” Aquino III.

Gibutyag usab ni Plaza nga ang Liberal Party ni Noynoy nagpunay og pangulitawo sa mga sakop sa Lakas-Kampi-CMD nga patapunon ngadto kanila, apan gikataw-an lamang kini sa lig-ong mga supporter ni Gibo.

 Dugang pa niya nga may silent majority na nga mipagawas sa tinuoray nilang gusto nga si Gibo gayud maoy angayang kandidato sa pagka-presidente sa nasud busa maoy ilang botohan ug padag-on sa Mayo 10 nga election. – BANAT NEWS