Katol nakasunog sa balay

CEBU, Philippines - Gumikan lang sa katol nga wala mapawong duol sa kama nga gituohang nasindolan maoy nakaingon sa pagkasunog sa upat ka panimalay ug laing tulo ang partially damage kagahapon sa buntag sa sitio San Miguel sa barangay Apas ning siyudad.

Nagtinabangay ang gatosang mga trainees sa Philippine Army ug Regional Training School sa kapolisan diha sa kasikbit nga dapit sa pagpawong sa sunog nga miigo alas 7:20 sulod sa 20 minutos.

Si SFO2 Roylen Maratas ang imbestigador sa Cebu City fire department nga nahinabi sa Banat News mitug-an nga nagsugod ang sunog diha sa panimalay sa magtiayong Andy ug Analizer Baltazar ug hingpit nga milanoy sa lain pang tulo ka panimay nga gipanag-iya nila ni Eusebio Bacasno, kagawad sa barangay Apas, Roy Munez ug Aldie Dimaolao nga usa ka retiradong sakop sa Cebu City Fire Department.

Samtang ang tulo ka panimay nga partially damage gipanag-iya nila ni Cristito Conales, Gary De Gracia ug Carlos Baltar.

Si Maratas mibana-bana sa kinatibuk-ang danyos nga P450 mil tungod kay dako ang panimay ni konsehal Bacasno.

Subay sa pasiunang imbestigasyon ni SFO2 Maratas nga walay kuryente ang magtiayong Baltazar ug kerosene (gas) ug kandila lamang ang gigamit matag gabii.

Apan ang katol nga wala mapawong sulod sa kwarto maoy ilang gisubay sa ilang nagpadayon nga imbestigasyon nga maoy hinungdan sa sunog.

Ang asawa niini nga si Analizer nga nahinabi sa Banat News mitug-an nga sa wala pa masunog ang ilahang balay, siya ug ang ilang upat ka anak nag -estoryahanay sa pikas kwarto dihang kalit misilaob ang pikas kwarto diin mahimutang ang nagbaga pang katol.  – BANAT NEWS