Sonny O mi-endorso ni Mary Ann ug Georgia

CEBU, Philippines - Mi-withdraw sa iyang kandidatora si mayoralty candidate John Henry ‘Sonny’ Osmeña apan mi-endorsar sa ig-agaw nga si Georgia Osmeña pagkamayor sa dakbayan ug Lahug barangay Kapitan Mary Ann delos Santos sa pagka-kongresista sa North District ning dakbayan.

Si Osmeña nagkanayon nga ang iyang rason sa pagsibog, gusto niyang matibuok ang botos ug suporta alang sa usa ka Osmeña pagkamayor sa dakbayan imbes nga mabahin gumikan sa iyang pagdagan.

Matud pa niini nga dili siya buot makita ang dakbayan sa Sugbu dumalaon ni Bise Mayor Michael Rama nga maoy kandidato sa partidong Bando Osmeña Pundok Kauswagan nga gipangulohan sa iyang ig-agaw nga si Mayor Tomas Osmeña nga igsuon usab ni Georgia. Sumala pa ni Sonny Osmeña nga gikuyawan siya sa mga nanggawas karong balita nga dili maayo batok kang Rama ilabi na kabahin sa giingong pakighugoy-hugoy niini sa usa ka gipasanginlang drug lord.

Si Osmeña nagkanayon nga ang pagpili niya kang delos Santos mao ang pagkaangayan ug katakos niini sa pag-representar sa north district didto sa hawanan sa Kongreso kun kini maoy mapiling kongresista.

“I have always admire Mary Ann delos Santos, because she would be an outstanding representative in the Congress, though she don’t know how to sing and dance but she will not need that on the floor of the Congress,” matud pa ni Sonny Osmeña.

Samtang si Georgia Osmeña sa report sa Balitang Bisdak kagahapon nagkanayon nga ang ilang panaghiusa karon ni Sonny Osmeña makatabang og dako sa iyang kandidatura.

Masaligon siyang ang mga botos nga adto kang Sonny adto mapunta kaniya tungod kay siya nalay nahibiling lehitimong Osmeña nga anak ni kanhi senador Sergio ‘Serging’ Osmeña. “I think we have now a real Osmeña running and not just a proxy of the Osmeña,” dugang pa niini. Kabahin kang Rama ug sa pasangil sa usa ka kandidato sa pagkakonsehal nga nakig-hugoyhugoy ang kandidato pagkamayor sa BOPK sa usa ka gipasanginlang druglord matud pa niini dili kini maayo sa usa ka gustong mahimong mayor.

“Even if it is just a hint, it’s so scary,” dugang pa niya.  – BANAT NEWS