Polis 'nanion' og bana sa kagawad; laing duha gipabalhin ni Digal

CEBU, Philippines - Usa ka polis nga pag-umangkon og board member gireklamo sa usa ka konsehal sa barangay nga nanion kanila og armas sa bukirang bahin sa sitio Kalub barangay San Antonio lungsod sa Boljoon niadtong Huwebes sa alas 10:15 sa gabii, samtang laing duha ka polis ang giimbestigar gumikan sa pagkuyog-kuyog og politiko.

Ang mireklamong gitionan mao si Kagawad Nenita Endrina sa San Antonio, kauban ang bana niining si Eugenio Endrina molupyo sa nahisgutang lugar samtang ang gireklamo mao si PO1 Ariel Derama, taga Poblacion, Boljoon nga nadestino sa kapulisan sa maong lungsod.

Gibutyag ni Eugenio dihang nahinabi sa Banat News sa telepono   nga sakay silang duhang magtiayon sa ilang pag-umangkon nga si Leny Sepiar paingon nang mamauli gikan sa lungsod.

Pag-abot sa maong dapit gipara sila ni Derama kauban sa hepe nga si Sr. Insp. Eduard Villarin ug SPO4 Emmanuel Villareal dayong rekisa kanila ug gipangitaan sa lisensiya ug rehistro sa motor.

Sumala pa ni Endrina nagkakomprontase sila ni Derama dihang nasuko kining iyang giingnan nga ‘ayaw siya (kagawad) og hikapa’ dihang paingon kining mokapkap kanila.

Gikatahong nasuko ang mga polis ug gipahubo siya sa iyang gisul-ob nga sininang kolor yellow nga dunay pangan sa kandidatong si ‘Inday Mubarak’ nga kaatbang sa iyaan ni Derama nga si bokal Teresita “Daday” Celis.

Dugang pasangil ni Endrina nga gitionan pa siya tumong sa iyang tiyan sa M-16 Armalite rifle ni PO1 Derama tungod sa kahadlok gihubo nalang niini ang t-shirt ug diha pa mikalma ang maong polis dayong mandar kanila sa pagpadayon sa ilang biyahe.

Gisuwayan pagtawag sa Banat News si Villarin ug Derama kabahin sa hitabo apan magsige lang og bagting ug walay motubag samtang ang cellphone number niini dili usab makontak.

Samtang duha ka polis nga sila si SPO3 Lino delos Santos ug PO2 Adolfo Ballovar sa Tuburan ang ipabalhin og laing dapit human dunay usa ka mayoralty candidate ang mireklamong giingong magkuyogan ang duha sa usa ka politiko.

 Matud pa ni Sr. Supt. Erson Digal, director sa Cebu Provincial Police Office tanang polis nga dunay kabanay’ng politiko sa usa ka lokalidad diin sila madestino ibalhin. – BANAT NEW