Survey pabor ni Davide gikataw-an

CEBU, Philippines - Gikataw-an lamang ni Gob. Gwendolyn Garcia ang gipakatap karon nga resulta sa survey nga nagpakitang naapsan na siya ni Liberal Party gubernatorial candidate Hilario ‘Junjun’ Davide III sa pagkagobernador sa lalawigan sa Sugbu.

Sigon sa naasoy’ng resulta sa survey nga si Davide nakakuha og 51.67 porsiyento samtang si Garcia nakakuha lamang og 39.50 porsiyento gikan sa 3,012 ka mga respondents.

Apan ang maong survey gisalikway ug gipakagamay lamang ni Garcia nga mihulagway sa surveys nga usa lamang sa mga “stunts” sa mga kandidato sa kontra partido.

Nagtuo si Garcia nga ang responsable sa pagpakatap sa resulta sa walay klarong survey mao kadtong mga kandidatong pildihonon sa umaabot nga election.

Matud pa sa gobernadora nga lisod tuhuan ang mga survey karon aron maoy basehan sa pagpangangkong makadaog sila sa umaabot nga election tungod kay sayod siyang layo ra kaayo kini sa tinuod.

Ang gobernadora miingon nga ang matag boto nga iyang maangkon gihaguan gyud niya pag-ayo sa pagpangampanya maong sigurado siyang makuha gyud niya ang kinadaghanang botos karong umaabot nga election. – BANAT NEW