'Mismanaged' ang Mandaue: Ruiz, Fortuna

CEBU, Philippines - Gihulagway sa kandidato pagkamayor ug bise mayor sa Nacionalista Party sa dakbayan sa Mandaue nga na-“mismanage’ sulod sa tulo ka tuig ang pagdumala sa dakbayan sa Mandaue ni incumbent Mandaue City Mayor Jonas Cortes nga magpasubli usab sa pagkamayor ubos sa Liberal Party karon.

Si Kong. Nerissa Soon-Ruiz ug Bise Mayor Carlo Pontico Fortuna atol sa usa ka press conference kagahapon mitubag sa hagit ni Cortes nga papangayuon og pasaylo si Ruiz sa katawhan gumikan sa pagsuporta niini sa Reproductive Health Bill kon (RH Bill) ug ang kanunay nga pagbabag sa city council sa dakbayan sa Mandaue sa mga proyektong buot himuon ni Cortes.

Gipanghimakak ni Ruiz ug Fortuna ang mga alegasyon ni Cortes ug misumbalik sa paghulagway nga walay mga dagkong proyekto nga nahimo sa dakbayan sa Mandaue ang mayor sulod sa tulo ka tuig.

Si Fortuna mipakita sa usa ka hiniusang taho gikan sa konseho sa dakbayan sa Mandaue sulod sa tulo ka tuig nga pagdumala ni Cortes kung pila ang nahatag nga budget sa buhatan niini alang sa iyang mga proyekto nga nasutang walay resulta ug ang uban wala maimplementar sulod sa iyang termino.

Sumala pa niini ang konseho mi-release og P2.8 bilyones nga salapi gikan 2007 ngadto sa 2009 sa administrasyon ni Cortes apan walay nakitang dakong proyekto nga napakita ang mayor.

Samtang miubos usab ang kita sa buhis sa dakbayan base sa natala sa City Treasures Office kun itandi sa kanhing administrasyon ni Mayor Thadeo ‘Teddy’ Ouano sumala pang Fortuna.

Gikatahong sa panahon ni Ouano, makakolekta ang dakbayan og P1 bilyon matag tuig apan dihang si Cortes na maoy mayor P800 milyones na lamang ang makolekta.

Gihulagway sa duha nga mas giatiman ni Cortes ang iyang mga supporters nga gipasulod sa trabaho isip mga job order employees.

Samtang ang kagamay sa gigahing pundo alang sa mga proyekto sa kadalanan, drainage, basura ug ubang proyekto nga mobalor lamang og P71 milyones nagpakita lamang sa dili maayong serbisyo ngadto sa katawhan sa dakbayan sa Mandaue. – BANAT NEWS