Lola naka-ilad 20 ka tawo

CEBU, Philippines - Sobra sa 20 ka mga biktima sa pagpangilad nga gikan sa bukirang barangay sa dakbayan sa Naga ang nagpanon diha sa Police Station sa Naga ug mireklamo batok sa usa ka 62-anyos nga babayeng giingong miilad ug mikolekta kanila og kwarta.

Ang suspetsado mao si Nena Rodrigo, kini base sa identification card nga na-recover sa mga polis kaniya ug walay klarong address, nasuta usab nga migamit usab og pangalang “Lerna Pepito” ug “Mitchelle” ang suspek ngadto sa iyang mga biktima.

Ang suspek gikatahong nangangkong sakop sa “Center for Women Studies and Reception for Medical Mission” nga may gibutang nga address nga nagbase sa “NCR-District Office /Batasan Hills Quezon (Consumer Action Center)” apan aduna silay buhatan sa Ecotech sa barangay Lahug.

Dihang giadto sa mga polis ang address diha sa Lahug, usa diay kini ka pribadong balay nga adunay dagkong mga iro sa sulod.

Si Rodrigo mohaylo sa mga biktima nga magpasakop sa ilang foundation apan kinahanglang mobayad og P1, 500 nga registration fee, P2,300 alang sa rekisitos sa medical checkup.

Usa sa gikahibulongan sa mga biktima nga bisan wala sila sukad makigkita sa doctor aron magpa-checkup human sila makabayad aduna dayon sila’y medical result.

Samtang kadtong adunay problema sa mga birth certificates gipasaligan usab ni Rodrigo nga siya maoy mohikay niini tungod kay nanghambog kining duna sila’y legal counsel sa foundation apan P3,500 ang bayad alang sa proseso.

Gikatahong aduna say scholarship ug makatabang sa problema sa panglawas o insurance ang ilang foundation hinungdan nga nangahaylo sila pagbayad sa mga balayrunon.

Si Supt. Henry Biñas, officer-in-charge sa kapolisan sa maong dakbayan sa pakighinabi niini sa Banat News nagkanayon nga si Mayor Valdemar Chiong maoy unang nakadawat og sumbong sa mga biktima niadtong Abril 27, 2010.

Ang pagkasikop sa suspek natigayon human usa sa mga nagpa-miyembro nga si Flavio Arañas nga adunay sakit sa tiyan ug nadala sa Vicente Sotto Memorial Medical Center.

Apan dihang ilang gitawgan si Rodrigo aron magpatabang sa medical insurance niini daghan kini og pasumangil kay didto siya sa Toledo, dihang giusban og tawag nangangkon kining didto sa Danao dayon sa Lahug tungod kay busy kini sa ‘medical mission.’

Sa tanto nilang tawag apan wala mopakita si Rodrigo napugos sila og pagbayad sa ilang kaugalingong kwarta, tungod niini misumbong na sila kang Chiong.

Si Generoso Arias, kansang asawa mao si Elena Arias nga miyembro usab sa foundation ug igsuon ni Arañas maoy midangop kang Chiong hinungdan nga gipapahigayon ang entrapment pinaagi sa paghaylo sa suspek nga adunay laing interesadong mosulod sa foundation.

Gikatahong human dawata ni Rodrigo ang duha ka tag P500 nga marked money gisikop siya sa mga polis.

Si Elizabeth Marino, 39, laing biktima nga taga Lamac nga adunay mayoma gipasaligan usab sa suspetsado nga tabangang mapa-opera apan nailad human gipabayad og P676 alang sa biopsy ug gipatumar og tambal nga walay label.

Gawas sa maong mga biktima aduna pay estudyante ug ubang ginikanan nga mibutho sa police station aron moreklamo batok sa suspek

Si Rodrigo dihang gikuhaan og pamahayag sa Banat News kabahin sa mga pasangil batok kaniya nagdumili pagtubag.

Si Biñas nagkanayon nga kasong estafa ang atubangon ni Rodrigo nga ilahang gipasaka kagahapon sa city prosecutors office sa maong siyudad. – BANAT NEWS