CEBU, Philippines - Lima ka lalaki ang nadakpan samtang giingong nanuyop og illegal nga drugas ug nagsugal niadtong milabay’ng adlaw atol sa saturation drive sa kapolisan sa barangay Looc ug Cambaro sa dakbayan sa Mandaue.
Ang mga sakop sa Station 5 ingon man mga sakop sa Station 3 pinangulohan ni Insp. Wilson Abot misubay sa sitio Baybayon barangay Looc ug nasigpatan sila si Mario Rivera, 29, Mark Sinay, 23, ug Jeffrey Pagaling, 30, pulos molupyo sa maong lugar nga nagduwa og “cara y cruz” o hantak. Si Pagaling nakuhaan og usa ka paketeng may sulod nga gidudahang shabu.
Samtang nadakpan sa buy bust operation ang usa ka lalaki nga nailhan nga si Jeremy Suano, 28, taga Purok Tambis barangay Umapad sa maong syudad.
Si Suano gikatahong mibaligya og usa ka paketeng shabu nga nagkantidad og P200 sa usa ka poseur buyer hinungdan sa pagkasikop niini.
Sa laing bahin, nadakpan si Lyle Alquizar human maatlang naghithit og marijuana diha sa Purok 1 barangay Cambaro sa maong syudad, sumala pa sa kapolisan dunay mga kauban si Alquizar nga naghithit apan nakabantay ug nanagan, si Alquizar mao ray naabtan tungod kay kini nasukamod. - BANAT NEWS