Polis patay, 2 menor angol sa aksidente

CEBU, Philippines - Patay ang usa ka polis human mosampak ang iyang gimanehong motorsiklo sa gikasugat nga laing motorsiklo sa miaging gabii diha sa sitio Landing sa barangay Daanlungsod, Medellin.

Ang polis nga namatay giilang si PO3 Edgar Perez, nagpuyo sa barangay Antipolo, Medellin ug nadestino sa Malabuyoc police station samtang ang gikadasmag niini mao ang kolor blue nga XRM motorsiklo nga gimaneho sa usa ka 17-anyos nga taga Kawit Medellin uban sa angkas niining 14-anyos.

Si PO3 Arquimedes Villapez sa Medellin Police Station nga nahinabi sa Banat News nagkanayon nga subay sa imbestigasyon gikan namista sa barangay Poblacion si Perez ug padulong na pauli.

Samtang ang duha ka menor gikan sa barangay Kawit paingon sa Poblacion kay giingong motambong og disko apan kalit mi-overtake sa gisundang traysikol ug midasmag ngadto kang Perez.

Ang polis ug ang duha ka menor pulos nakaangkon og mga kadaut sa kalawasan ug gihatud sa Verallo Memorial District Hospital sa siyudad sa Bogo apan si Perez gideklarar nga dead on arrival (DOA).

Dugang nahipos nga kasayuran sa kapolisan nga pulos walay lisensya si Perez ug Sunit ug wala say rehistro ang ilang motorsiklo. – BANAT NEWS