Pusil ug dunggab duha angol

CEBU, Philippines - Duha ka tawo ang naangol sa pagpamusil ug pagpanunggab didto sa lungsod sa Pinamungajan sa miaging gabii.

Ang mga biktima mao sila si Darios Cañalita, 24, minyo, usa ka mananagat nga taga sitio Bulubugan, barangay Tahaw sa maong lungsod ug si Boy (dili tinuod niyang ngalan) menor de edad nga silingan ug ig-agaw ni Canalita 

 Samtang ang mga suspetsado mao sila si Limuel Villanueva, 20, ulitawo, nga taga Luray Uno, sa dakbayan sa Toledo, nga maoy nakapusil kang Canalita , ug si Jeffrey Lizarda, 20, nga maoy nakadunggab sa batan-ong biktima.

Si Canalita samdan sa baba sa usa ka bala gikan sa armas sa suspetsado nga wala hisayring kalibre, samtang si Boy samdan usab sa iyang kilid sa kutsilyong gigamit sa suspetsado.

Si PO2 Salvador Samillano sa Pinamungahan Police Station mibutyag sa Banat News nga si Canalita nagsayaw sulod sa diskohan sa lungsod dihang gibaba siya pagpusil ni Villanueva.

Dihang natumba sa yuta si Canalita tiwasan na unta sa suspetsado, apan miuwang si Boy nga ig-agaw ni Canalita hinungdan nga mao na usab kini ang gitionan sa suspetsado sa iyang armas.

Sa kahadlok nga pusilon siya sa suspetsado si Boy mikabad og dagan apan nakit-an kini ni Lizarda nga amigo ni Villanueva ug gigukod dayon niini si Boy ug dihang naapsan, giluba ang kilid sa biktima.

Gihatod dayon sa tambalanan sa dakbayan sa Sugbo ang duha ka biktima samtang si Villanueva ray nadakpan sa kapolisan ug nagtingkagol na karon sa prisohan    samtang si Lizarda gipangita pa human kini makasibat.   (BANATNEWS)