Mananagat nalumos namatay

CEBU, Philippines - Namatay ang usa ka tawo human kini mahagbong sa pumpboat nga iyang gisakyan niadtong Sabado ug kagahapon pa sa buntag napalgi ang iyang patay nga lawas nga naglutaw na sa kadagatan didto sa barangay Punta Ingano, dakbayan sa Lapulapu.

Ang biktima mao si Selvestre Patalingjug, 69, minyo nga taga Punta Ingano.

Sumala sa kapolisan nga mikuyog ang biktima sa mga silingan niyang mananagat nga sila si Antonio Abella, Sammy Balaod, Cresente Pulvera ug Dionesio Iway nga pulos minyo ug mga hingkod ang panuigon.

Si SP03 Rex Ybanes, imbestigador sa homicide section sa kapolisan sa maong dakbayan miingon nga alas 3:00 pa sa hapon sa miaging Sabado nanagat ang grupo .

Apan usa sa kauban sa biktima nga si Pulvera misugilon sa kapolisan nga wala nila hibantayi nga nahagbong diay ang biktima, ug sa pagkamatngon nga wala na kini sa sakayanan, gisawom dayon nila ang kadagatan apan wala gyud nila hikit-i si Patalingjug.

Apan kagahapon sa buntag naglutaw na ang patay’ng lawas sa biktima nga nakit-an ni Peter Taruc, 25, usa ka guwardiya sa usa ka establisimento sa Punta Ingano.

Si Taruc nay nagpahibawo sa kapolisan ug sa pagsulat ning balita wala pa ka-otopsihi ang minatay. – BANAT NEWS