Napungkol kay gitigbas sa kontra

CEBU, Philippines - Napungkol ang usa ka tawo human matangtang ang duha ka tudlo niini kay gitigbas sa iyang kontra didto barangay Bugin, lungsod sa Moalboal sa miaging gabii.

Ang biktima mao si Bienbenido Talledo, 64, minyo nga taga barangay Bugin, samtang ang suspetsado mao usab si Eddie Fuentes, 33, nga taga barangay Mangga, lungsod sa Alcantara.

Si SPO1 Artemio Cababat sa Alcantara Police Station mibutyag sa Banat News nga daan nang nagkadumot ang biktima ug ang suspetsado.

Gumikan kay nakainom, nagtakin og sundang ang biktima nga misulong sa suspetsado nga didto sa ilang balay niadtong tungora.

Apan ang suspetsado nga nakainom usab nanalipod sa iyang kaugalingon ug milanit usab sa iyang sundang ug wala magpaabot nga hi-unhan sa paghabas, mihapos dayon sa iyang sundang ngadto sa misulong niyang kontra.

Giuna sa suspetsado ang pagtangtang sa duha ka tudlo sa biktima ug dayon gihapsan ang nawong niini sa iyang sundang ug wala gyud makabawos ang biktima.

Gihatod dayon ang biktima ngadto sa   Badian District Hospital apan gibalhin kini ngadto sa Vicente Sotto Memorial Medical Center (VSMMC) sa dakbayan sa Sugbo.

Nagkagulkol na karon ang suspetsado sa prisohan sa kapolisan human kini motahan sa iyang kaugalingon ngadto sa mga otoridad sa kapolisan sa Alcantara Police Station. – BANAT NEWS