Mipungko sa libon naunay sa iyang pusil

CEBU, Philippines - Ang kapolisan sa dakbayan sa Naga nagtuo nga naunay ra sa iyang armas ang usa ka tawo nga nasabak sa bala samtang mitubag sa sugo sa lawas sa kalibonan duol sa ilang balay sa sitio Suton, barangay Pangdan, dakbayan sa Naga sa miaging gabii.

Sa samang higayon gibutyag ni Inspector Abell Laborte, deputy chief sa City of Naga Police Station nga walay labot ang politika sa maong hitabo.

Iyang gibutyag sa Banat News nga nagtuo sila nga si Pablo Manabat posibleng nagtakin og armas de fuego dihang aksidente kining mibuto sa iyang pagpungko aron mangisog. Si Laborte nagkanayon nga mitumaw ang ilang katahap tungod kay ang biktima ug ang mga paryente niini wala mo-report sa maong insidente sa ilang buhatan.

Ang kapolisan nakadawat na lang og tawag gikan sa usa sa mga molupyo sa maong lugar kabahin sa hitabo.

Matud ni Laborte nga dihang miadto sila sa lugar nga nahitaboan, ang igsoon ni Manabat nagdumili sa paghatag og pamahayag ngadto kanila.

Human maigo sa bala ang walang paa ni Manabat gidala kini deretso sa iyang mga paryente ngadto sa tambalanan.

Si Laborte mibutyag usab nga adunay mga molupyo sa bukirang barangay sa siyudad nga naghupot og mga armas nga wala motuman sa awhag sa kapolisan nga ipatahan kini ngadto sa gobiyerno.  – BANAT NEWS