Anak sa principal gisikop

CEBU, Philippines - Usa ka anak sa kanhi prinsipal ang nasakpan sa akto sa mga tanod ug opisyal sa barangay sa Candulawan human kini giingong misuway og kawat sa personal computer nga nahimutang diha sa principal’s office sa Candulawan National High School kagahapon sa kaadlawon.

Si PO2 Leandro Azarcon sa Talisay City Police Station miila sa suspetsado nga si Andrew Gene Teologo, 21, nagpuyo diha sa nahisgutang barangay ug anak sa kanhi prinsipal sa maong tunghaan.

Si Teologo nasikop nila ni barangay kagawad Adolfo Torregosa, hepe sa tanod nga si Loreto Amancia ug Sancho Flores.

Si Azarcon mibutyag kagahapon sa Banat News nga ACER personal computer bag-uhay palang gihatag ni Kong. Eduardo Gullas niadtong Sabado sa milabay’ng semana sa maong tunghaan.

Nag-roving sa maong tunghaan si Flores niadtong higayona ug nabantayan niini nga giguba ang bintana sa buhatan sa prinsipal ug ang monitor sa nahisgutang computer diha na sa gawas.

Si Flores daling mibiya ug nangayo og panabang kang Torregosa ug Amancia ug gibalikan ang tunghaan ug naatlan nilang nagbitbit si Teologo sa Central Processing Unit (CPU) sa computer nga iyahang gipalusot sa gigubang bintana.

Ang suspetsado gisignit sa nahisgutang mga tanod ug kagawad sa barangay ug gidala ngadto sa Talisay City Police Station sa barangay Poblacion.

Sa laing bahin, sobra sa P60 mil ang kantidad sa salapi, alahas ug uban pang butang walay labot sa P103, 250 nga kantidad sa tseke ang nadala sa wala mailhing kawatan gikan sa usa ka balay diha sa Ramona Village, barangay San Isidro, dakbayan sa Talisay.

Ang pagkahanaw sa maong kantidad ug kabtangan nabantayan lamang niadtong Sabado sa alas 5:30 sa hapon sa mga biktimang sila si Tito Rodriguez, 59, ug Marcelino Pastor, 39.

Si PO2 Azarcon nagkanayon nga wala diha sa ilang balay ang mga biktima dihang nahitabo ang pagpanglungkab, gikatahong giguba sa kawatan ang bintana sa kusina aron makasulod.  – BANAT NEWS