Lalaki nalatayan sa tanker patay

CEBU, Philippines - Patay ang usa ka lalaki human kini nalatayan sa usa ka Isuzu Tanker sa provincial road sa Catarman lungsod sa Lilo-an pasado alas otso sa miaging gabii. Si Billy Fernandez Taray, 27, molupyo sa Estaca lungsod sa Compostela ug lumad nga taga Guihulngan Negros Oriental maayong pagkagusbat sa lawas human malatayi sa tanker nga gimaneho ni Danilo Villarin Nacis.

Nasayran nga ang biktima nagsakay og bisekleta sa National Highway sa nahisgutang lugar dihang kalit lang kining misaliring ug natumba tunga-tunga sa karsada.

Naatol sa pagkatumba niini ang pag-agi sa trak ni Nacis ug uwahi na kining nakabantay kang Taray nga nalimbuwad sa iyang bike ug naligsan kini.

Sa pakighinabi sa Banat News ni SPO4 Remigio Relascion mibutyag kining kasamtangan karun nga nagtingkagol ang driver sa maong truck sa ilang buhatan aron ilang pasakaan og kasong reckless imprudence resulting to homicide. – BANAT NEWS