CEBU, Philippines - Pagbukas sa klase hayan madelatar og usa ka semana gumikan sa ipahigayong census sa National Statistic Office kon NSO karong tuiga.
Matud pa ni provincial statistic officer sa NSO nga si Pirmo Despotado nga ang pagbukas sa klase karong bulan sa Hunyo magsugod sa ikaduhang semana inay sa naandan nga unang semana sa bulan sa Hunyo.
Kini tungod kay maapektohan sa ilang ipahigayon nga census nga pagsugdan sa Mayo 17 hangtud na sa Hunyo 17 ning tuiga tungod kay ang mga magtutudlo mao man ang magsilbing supervisor sa mga enumerators sa ilang census base sa napirmahang Memorandum of Agreement tali sa NSO ug ni Education Secretary Jeslie Lapus niadtong nakalabay’ng bulan.
Tungod niini, ang buhatan ni DepEd-7 regional director Recaredo Borgonia mipahibawo na sa mga district superintendents kabahin sa maong adjustments ug sa census.
Gipaniguro hinuon sa regional director sa DepEd nga moabot gihapon sa 203 ang school days sa mga kabataan alang niining tuiga bisan og madelatar ang pagbukas sa klase sanglit lugwayan man usab ang graduation o pagtapos sa klase sa bulan na sa Abril sa sunod tuig.