Polis nakaangol pagpasalba sa armas

CEBU, Philippines - Gitanggong sa karsel ang usa ka polis nga gipasanginlang nagpabuto sa iyang armas ug nakaangol sa usa ka batan-ong lalaki diha sa national highway sa barangay Labogon, dakbayan sa Mandaue.

Ang maong polis nga gitanggong human sa pagtahan sa iyang kaugalingon mao si PO2 Benjamin Clloyd Yu, 34,nagpuyo sa Doña Rosario Village sa barangay Labogon ug nadestino sa operation division sa Cebu Provincial Police Office.

Ang naangol mao si Adonis Ecalina, 19, taga Ouano Compound sa barangay Opao sa maong dakbayan kinsa dali nga gidala sa Mandaue City District Hospital human makabaton og samad sa iyang tiil.

Si PO3 Edgardo Pasaylo sa kapolisan sa Station 3 sa maong dakbayan nga nahinabi sa Banat News miingon nga nakadawat sila og usa ka tawag nga aduna’y nagpabuto sa maong dapit.

Usa ka 18-anyos nga batan-on diha sa maong dapit pagkahitabo mitudlo kang PO2 Yu maoy nagpabuto og 9mm pistol human makalalis ang grupo ni Ecalina sa wala pa matinong hinungdan apan gikatahong sa wala pa mopabuto si Yu gisukmag kini sa usa sa mga batan-on ug nabarag.

Si Yu mitahan sa iyang kaugalingon lakip na ang armas ug mga bala, gikatahong napiskan og tipaka sa semento ang tiil ni Ecalina dihang mipabuto sa ubos ang maong polis. – BANAT NEWS